Oseana held fram med å halde ope kvar dag heile veka!
Oseana kunst- og kultursenter har hatt svært gode besøkstal dei fyrste to kvartala i 2016 og satsar difor vidare med å halde ope kvar dag, fram til jul.
- Vi ynskjer å gje osingane eit endå betre servicetilbod, grunngjev direktør Ole Tobias Lindeberg den nye satsinga med.
Heilt sidan Oseana opna i 2011 har både kafeen og resepsjonen hatt vinterlukking frå 1. september, noko som har betydd at heile huset har vore stengt måndagar og tysdagar. Både i resepsjonen og i kafeen merkar dei no at fleire og fleire osingar er innom huset på dagtid i vekene, både i lunsjpausen og etter arbeid.
- Vi har hatt ei sterk auke i bruk av lunsjtilbodet vårt siste halvår, seier Mjelstad, og Lindeberg kan bekrefte at den same trenden gjer seg gjeldande i resepsjonen.
- Mange stikk innom oss i lunsjen for å kjøpe billettar, eller på vegen heim frå arbeid. Dette syner at det er eit tilbod som osingane nyttar seg av. Heile huset held difor fram med å vere ope sju dagar i veka, i fyrste omgang fram til jul, seier Lindeberg.
Å kunne tilby eit mattilbod i samband med kulturarrangementa på huset er eit viktig tilbod for Oseana kafé og restaurant. Med vidareføringa av vekesope hus meiner Mjelstad at endå fleire kan få sjansen til å nytte seg av dette tilbodet.
- Mange vel å bruke oss før eller etter dei har vore på eit arrangement, og kombinerer dermed kulturopplevinga si med ei matoppleving. Her har vi merka større og større pågang, og på fleire av konsertane utover hausten har vi allereie no nesten fullbooka restaurant, fortel Mjelstad.
Lindeberg er einig:
- Å ha heile huset ope kvar dag gjev oss ein endå større fleksibilitet til å kunne tilby dette, spesielt no når vi går inn i høgsesongen med kulturarrangement og julebord, avsluttar Lindeberg.
Opningstider i resepsjon/ billettluke og kunstutstillingar:
Måndag - fredag: 11.00 - 16.30
Laurdag - søndag: 12.00 - 18.00
Opningstider Oseana kafé og restaurant:
Måndag - laurdag: 12.00 - 19.00
Søndag: 13.00 - 17.00