Det vart i dag klart at det går mot slutten på den suksessfulle sommarfestivalen Rock n' LoL på Søfteland. Brørne Andreas og William Lindborg gjer seg etter årets festival, som er den sjuande i rekkja. For å avslutte det heile med stil inviterer dei no, i samarbeid med Oseana, til konsert med Datarock laurdag 21. september kl. 20:00. Konserten er eit samarbeid mellom festivalen og Oseana.
- Datarock var ikkje i tvil når vi spurte om dei ville vere med å avslutte kalaset saman med oss, seier Lindborg'ane, som no gler seg til å fylle storstova på Oseana med over tusen elleville Datarock- og Rock n' LoL- fans. Datarock treng vel neppe nokon nærare introduksjon, men det kan jo nevnast at dei har opptrådde på festivalen i 2012, og at dette etter sigande var noko av det kulaste dei hadde vore med på.
Andreas og William lovar også fleire overraskingar knytt til denne konserten.
- Datarock er heller ikkje dei einaste som vil vere på scena denne kvelden! Fleire ting vil dukke opp etter kvart, lovar dei, som sjølve ser fram til ein konsert som dei kan få nyte frå tilskodarplass.
- Det skal bli godt å sleppe å arrangere så mykje, og heller vere ein del av festen, seier dei, og trur på god stemning og høg partyfaktor.
Billettane er allereie i sal, du finn dei her! NB! Merk at konserten har 18 års aldersgrense!
Foto: Thomas Brun