Tysdag 19. august besøkjer folkedansgruppa Strilaringen Oseana, og med seg har dei Slask Song and Dance Ensamble frå Polen. Besøkjet er ein del av ein større Vestlandsturne, og danseframsyningane er siste del av eit felles prosjekt med støtte frå EØS sine kulturutvekslingsmidlar. Alle danseframsyningane er gratis.
Slask Song and Dance Ensamble er ei verdskjent profesjonell dansegruppe. Dei er kjende for sine imponerande danseshow med fart og presisjon, mange kostymeskift, fargerike drakter, imponerande spenst og dristige løft.
Strilaringen vart kontakta av Slask- ensamblet hausten 2012, og saman sende dei inn ein felles søknad til kulturdepartementet i Polen. Målet med prosjektet er å vise mangfaldet og det folkelege i folkedans, og bidra til at tradisjonar vert haldne i hevd. Det er Norsk Kulturråd som har lagt til rette for samarbeidsprogrammet mellom EØS- land og ulike EU-land, som til dømes Polen.
Strilaringen har våren 2014 vore i Polen og vore med på framsyningar der, og no er det Slask sin tur til å kome til Noreg. Strilaringen og Slask har kvar sine innslag i framsyninga, og begge programma er sette saman for å vise særpreget og mangfaldet folkedans har, uansett land. Strilaringen sitt program er sett saman av bygdedans, runddans, rekkjedans og songdans, samt lydslåttar.
Framsyninga har gratis inngong for alle, og er ein flott sjanse til å få med seg både polsk og norsk dansekultur!
