Denne hausten har Oseana starta opp eit nytt tilbod. Lars Kolstad, også kjend som Trommelars, held Trommesirkel i Vargasalen tre søndagar fram mot jul. Fyrste sirkel vart ein kjempesuksess,
-Det oppsto ein kollisjon for Trommelars, så vi har endra dato for den andre runden av Trommesirkelen, forklarar kulturhusvert Janne Mari Hjelle. - Det vert ikkje trommesirkel 12. oktober, men derimot 26. oktober, framleis kl. 13.00.
Det er no også råd å førehandskjøpe billettar til den 26. oktober.
-Vi såg jo raskt at etterspurnaden var stor, så frå no og fram til 26. oktober kan ein kjøpe billettar på førehand i Oseana. Dette er ikkje Billettservice- billettar, så publikum lyt kome i resepsjonen og kjøpe dei over disk. Dei kan heller ikkje tingast eller leggast av, så her er det den gode, gamle fyrstemann til mølla som gjeld, seier Hjelle.
Fyrste runden var overfylt, så Oseana er ikkje framand for tanken om ekstra-tromming.
-Det er plass til 25 deltagarar på ein Trommesirkel, dette er fordi Trommelars skal få til det fine samspelet mellom seg og deltakarane. Skulle denne bli utseld fort, så kan det hende vi set opp ein ekstra-sirkel, men denne blir ikkje opna sal på før den fyrste er utseld, seier Hjelle, som oppfordrar folk til å kjøpe billettar og oppleve Trommesirkelen sjølve.
-Vi har høyrt om besteforeldre som har møtt opp på Trommesirkel aleine fordi barneborna var vekke i bursdag, så dette er noko som fenger folk i alle aldrar!