Oseana startar denne våren opp Laurdagskafé med lesestund, eit familietilbod utvalde laurdagar utover våren. Fyrste kafé gjekk av stabelen 17. januar, og mange fleire enn forventa tok turen.
- Det var fullt hus og god stemning, seier initiativtakar og kurator på Oseana, Marianne Gathe.
- Kort tid ut i kaféen var vi tome for risgraut, og det beklagar vi veldig! Etter kvart kom det andre mattilbod på bordet, men til neste gong lovar vi graut til alle!
Laurdagskaféen er eit stikk-innom-tilbod for barnefamiliar, der ein finn teiknekrok, risgraut og høgtlesing ved Mari Lyssand.
- Det var absolutt ein suksess, med mange gode tilbakemeldingar! Vi har no lært av fyrste runde, og bemannar opp både med folk og graut til neste kafé 7. februar, lovar Marianne. Då vil kaféen også finne stad i Vargasalen også, for at det skal bli betre plass til alle.
- Vi ynskjer både gamle og nye gjestar velkomne til ein fin start på laurdagen 7. februar!
Billetten kostar kr. 50,- og den betalar du i døra.