-Dette har vi jobba for lenge, og endeleg lukkast vi, seier ein nøgd arrangementsjef Berit Steen. Haustsesongen blir avslutta på Oseana med ei framsyning som praktisk tala er utseld i Oslo – direkte inn i Oseanasalen! Nøtteknekkeren, som går på Hovedscenen på Den Norske Opera & Ballett i Bjørvika i heile desember, blir streama til kinolerretet på Oseana. Streaming vil seie at ein direkteoverfører bilder frå ein stad til ein annan, som i dette tilfellet er frå Hovudscenen i Operahuset i Bjørvika.
Steen har lenge drøymt om å få til streamingframsyningar på Oseana.
-Heilt sidan eg såg Oseanasalen uferdig med det same eg starta i jobben, har eg tenkt at den måtte eigne seg heilt perfekt til å streame store operaproduksjonar eller teaterframsyningar til glede for osingane, seier Steen.
-Oseana er jo osingane sitt svar på Operahuset, der dei begge ligg vakkert plassert i vannkanten med spesiell arkitektur, smiler Steen, som tykkjer det er ekstra kjekt at det vart akkurat Nøtteknekkeren som fekk æra av å opne streaming- ballet i Oseana.
-Nøtteknekkeren er vel ved sidan av Svanesjøen den mest kjende balletten i verda, og med sitt juletema passar den perfekt til å avslutte Oseanasesongen rett før julaftan!
I Nøtteknekkeren møter vi den vesle jenta Clara, som er veldig spent på julekvelden. I gåve av onkelen får ho ei nøtteknekkardukke, medan broren Fritz får ein tinnsoldat. Denne nøtteknekkardukka blir hovudpersonen i ein vakker og magisk draum som Clara har. I draumen kjem både dukker, tinnsoldatar og mus til live, og vi får møte snødronningar, snøfnugg, prinsar og prinsesser før Clara vaknar igjen.
-Balletten er ein lang juletradisjon i mange store byar i alle verdas land, og mange store ballettdansarar har gått vegen frå Snøfnugg til Musebarn for å ende opp som prima ballerina Clara, seier Steen, som håpar at dette vil falle i smak hos publikum.
-Dette er eit prøveprosjekt for oss. Dersom oppslutninga er god vil vi absolutt ha slike framsyningar fleire gonger, kanskje frå store teater eller operahus rundt om i Europa, seier Steen. –Billettane får du på billettservice.no eller i resepsjonen på Oseana.
Streaminga startar kl. 15:00, der vi tel ned til framsyningsstart kl. 15:30. Kl. 15:10 får vi eit direkte intervju med ballettsjef Ingrid Lorentzen, før vi kl. 15:20 blir med bak scena og får med oss dei siste nervane før dansarane skal ut på scena. Kl. 15:30 startar det heile. Balletten varer i 2 timar, inkl. ein pause på 15 minutt. I pausen får vi også bli med bak scena igjen.