Det er mykje spanande som skjer i galleria på Oseana denne våren. Fleire nye endringar er på gong, både i Hvelvet og i Griegsamlingen.
Fyrst ute er ei endring i forhold til det som tidlegare er opplyst om utstillingane i Hvelvet. Utstillinga til Ragnhild Willumsen og Anne Grete Istad som skulle ha opna 16. mars, er flytta til å ha opning 27. april.
16. mars opnar i staden utstillinga Hamskifte, av Linda Soh Trengereid. Trengereid stiller ut oljemaleri som er store som dører, og som i overført betydning blir dører som viser inn i ein annan røyndom. Du kan trykke her for å lese meir om denne utstillinga, som står til 21. april.
27. april opnar så Ragnhild og Anne Grete si utstilling. Begge damene arbeider med akrylmaleri og blandingsteknikkar. Anne Grete malar på stoff som er limt på lerret, medan Ragnhild blandar inn sand.
28. april blir det også nyopning av den permanente Griegsamlinga. Griegsamlinga har stått slik den gjer no sidan Oseana opna i juni 2011, og no skal store delar av maleria bytast ut med andre maleri frå Per Grieg sr. si rikhaldige samling. Gunnar Danbolt har vore med- kurator for utstillinga, som vil opne søndag 28. april. Denne ombygginga og utstkiftinga gjer at Griegsamlinga lyt halde stengt i ein periode, frå og med 11. april og fram til nyopninga vil den ikkje vere tilgjengeleg for publikum. Hvelvet vil derimot vere ope heile tida. Meir informasjon om nyopninga kjem seinare.
Det er altså mange grunnar til å legge turen innom galleria på Oseana denne våren. Griegsamlingen og Hvelvet er ope i senteret sine opningstider, som er mellom 11.00 og 16.30 på kvardagar, og mellom 12. 00 og 18.00 i helgane.