Denne våren byter vi ut store delar av Griegsamlinga, og fyller på med nye bilder frå Per Grieg sr. si rikhaldige samling! Utstillinga kjem til å framstå på ein heilt ny måte, og med verk av mange store kunstnarar.
Vi kan allereie røpe at ein av veggane i sin heilskap blir via Edvard Munch, noko som passar bra i høve årets Munch- jubileum, der ein feirar at det er 150 år sidan kunstnaren vart fødd. Eit anna jubileum dette året er 100 års-jubileet for kvinner sin stemmerett, og kva passar vel betre då enn å ha ein vegg via til kunstens kvinner? I tillegg vil fleire kunstnarar bli representerte med fleire verk kvar, noko som vil skape ein fin kontinuitet og samanheng i samlinga.
Grunna denne ombygginga må Griegsamlinga halde stengt frå 15. april og fram til nyopninga søndag 28. april. Då blir det gratis utstillingsopning for alle, med musikalske innslag frå det lokale kulturlivet på Os, og enkel servering.
Hvelvet vil halde ope sjølv om Griegsamlinga er under ombygging. Utstillinga Hamskifte til Linda Soh Trengereid står til søndag 21. april. Laurdag 27. april opnar ei ny utstilling her, då er det Ragnhild Willumsen og Anne Grete Istad som stiller ut maleri i akryl og blandingsteknikk. Denne utstillinga opnar kl. 15.00, og vil ha eit musikalsk innslag av damekoret Octavia. Også denne opninga er gratis for alle.
Velkomne til ein ny og spanande kunstvår på Oseana!