Hilde Louise Asbjørnsen er noko så sjeldant som ein kombinasjon av sunnmørsk jazzsongarinne, låtskrivar, revyartist og tekstforfattar. Ho er kjend for mange frå humorduoen "Asbjørnsen & Joh" saman med Lene Kongsvik Johansen. Ho var også med i dirigentkonkurransen "Maestro" i 2010, der ho like godt stakk av med sigeren. I løpet av si jazzkarriere har ho gjeve ut fem engelskspråklege soloalbum, men hausten 2012 kom det fyrste på eige morsmål, faktisk på sunnmørsdialekt!
”Om å gå i blinde, om å be til han der oppe og han der nede, om å køyre altfor fort”. Hilde Louise sitt sjette album er ei hylling og ei bøn til månen om å sleppe å gje etter, servert i ein mix av jazz, pop og rock, med ein tvist burlesque. Låtane vart unnfanga på eit loft i SoHo i New York, og utarbeida i eit studio i Møllergata i Oslo. Asbjørnesn har vidareført samarbeidet med bande bak ”Sound your Horn”- albumet frå 2008, og ”Never Going Back” frå 2010, og med gitarist Svein Erik Martinsen som eit nytt tilskot. Bak spakane finn vi produsent Anders Aarum. Etter 10 år på scena som kabaretskodespelar og jazzsongerinne leverar Hilde Louise no sitt fyrste album på dialekt. Besetninga består av all verdas tangentar, kontrabass, trommer, perkusjon, banjo, strykarar og ein mektig Gretsch- gitar.
Foto: Kristin Støylen
