Det var mange skuffa store og små som ikkje fekk seg billett då Riksteatret var her med si oppsetjing av Klatremus og alle de andre dyrene i Hakkebakkeskogen i januar. No får både dei som fekk billett og dei som ikkje fekk det, sjansen til å sjå stykket på ny!
- Fyllingsdalen teater kjem til Oseana med si eiga oppsetning av Klatremus søndag 5. mai, fortel arrangementssjef Berit Steen.
- Det var jo så mange som ikkje fekk billett sist, at det var ikkje tvil om vi skulle takke ja då Fyllingsdalen ynskte å vise stykket her, seier Steen, som gler seg til å gje folk sjansen til å oppleve Egner sitt fantastiske univers ein gong til.
- Dette er eit riktig så bra plaster på såret til dei som ikkje fekk sett det sist. Fyllingsdalen teater spelte dette stykket i fjor haust, i anledning Egner- jubileumsåret. Dei hadde stor suksess, over 5.000 publikummarar såg stykket og dei fekk strålande kritikkar i både Bergens Tidende og Bergensavisen, seier Steen, som også denne gongen oppmodar folk til å ikkje vente for lenge med å kjøpe billettar.
- Det er stor sjanse for at desse billettane kjem til å gå like fort unna som dei førre gjorde, så ver tidleg ute dersom du vil sikre deg plass!
Billettsalet startar tysdag 5. februar kl. 09.00. Billettane kan du kjøpe i resepsjonen på Oseana, på Posten, Narvesen eller 7 Eleven, eller du kan bruke denne linken for å kjøpe billettar via Billettservice. For å lese meir om arrangementet kan du trykke her.