Det er no klart for ei ny utstilling i Hvelvet.
Laurdag 16. mars kl. 15.00 opnar den unge kunstnaren Linda Soh Trengereid utstillinga Hamskifte i Hvelvet. 29 år gamle Trengereid er utdanna frå Kunsthøyskolen i Bergen, og arbeider hovudsakleg med måleri, installasjon, skulptur og teikning. I kunstuttrykket sitt forskar ho på tema som kulturell og stadspesifikk tilhøyring, migrasjon, identitet, evna mennesket har til å tilpasse seg, eller framandgjering i forhold til miljø, omgjevnadar og kultur. Ho hentar ofte inspirasjon frå si eiga historie som utanlandsadoptert frå Seoul i Sør- Korea. Utstillinga Hamskifte består av maleri frå serien Imagined Homelands frå 2011/2012, og ein serie mindre maleri frå 2013 som er ei forlenging av dette prosjektet. Du kan trykke her for å lese meir om utstillinga.
Utstillinga opnar med gratis vernissasje og enkel servering. Det blir eit musikalsk innslag under opninga, det unge pianotalentet Christian Sommerfelt (14) frå Paradis vil spele Beethovens pianosonate nr. 2 i A- dur, 1. sats. Christian er også ein av dei fem solistane under årets De unge konsert som går av stabelen 10. april på Oseana.